Arzo e Wasal e Jama

آرزوئے وصل جاناں میں سحر ہونے لگی

زندگی مانند شمع مختصر ہونے لگی

راز الفت کھل نہ جائے بات رہ جائے مری

بزم جاناں میں الہیٰ چشم تر ہونے لگی

اب شکیب دل کہاں حسرت ہی حسرت رہ گی

زندگی اک خواب کی صورت بسر ہونے لگی

یہ طلسم حسن ہے یا کہ مآل عشق ہے

اپنی ناکامی ہی اپنی راہ بر ہونے لگی

سن رہا ہوں آرہے ہیں وہ سر بالیں آج

میری آہ نارسا بھی با اثرہونے لگی

ان سے وابستہ امیدیں جو بھی تھیں وہ مٹ گئیں

اب طبیعت آپ اپنی چارہ گر ہونے لگی

وہ تبسم تھا کہ برق حسن کا اعجاز تھا

کائنات جان و دل زیر و زبر ہونے لگی

دل کی ڈھڑکن بڑھ گئی آنکھوں میں آنسو آگئے

غالباً میری طرف ان کی نظر ہونے گی

جب چلا مشتاق اپنا کارواں سوئے عدم

یاس ہم آغوش ہو کر ہم سفر ہونے لگی

کلام حضرت شیخ غلام معین الدین مشتاق رحمتہ اللہ علیہ گولڑہ شریف